UIT DIE KANTOOR

Van ons Skoolhoof, Mnr. Mostert

Hartelik welkom op die webwerf van Bellville-Noord, die omgee-skool met ‘n plattelandse hart.

Ons is ‘n waardegedrewe, klein tot medium grootte, Afrikaanse skool wat op talle gebiede puik presteer. Wanneer ons in sport en ander aktiwiteite teen veel groter skole meeding, deins ons geensins terug nie.

Ons leerlinge, en hul ouers, kan op vele terreine inskakel en hul betrokkenheid laat geld.

Weereens welkom.

ONS MISSIE

Ons streef daarna om ons leerlinge tot gebalanseerde en verantwoordelike mense te ontwikkel in diens van hul medemens en Suid-Afrika. Dit geskied deur toepaslike en sinvolle kwaliteitonderrig. Ons poog om dit met deernis te doen as vennoot van die ouer sodat ons leerlinge hul volle potensiaal kan bereik.

MEER OOR ONSSELF

Bellville-Noord staan bekend as ‘n plattelandse skool in ‘n stadsomgewing. Bellville-Noord is amptelik geopen in Januarie 1950 met 68 leerlinge en drie onderwysers. Mej. C.M. Lochner was die heel eerste skoolhoof. Die skoollied is in 1966 geskryf deur mev. M. De Vos en deur Rosa Nepgen getoonset. Sedert daardie klein begin het die skool oor die jare gegroei tot ‘n medium-grootte Afrikaanse skool met ongeveer 540 leerlinge.

Ons netjiese en goed versorgde geboue en sportfasiliteite is die afgelope paar jaar opgegradeer. Afdakke is ook tot voordeel van ons leerders opgerig.

Twee goed toegeruste graad R-klasse word deur gekwalifiseerde onderwysers en ‘n assistent behartig. Ons poog om ons getal per klas (graad 1 tot 3) so klein as moontlik te hou indien dit finansieel haalbaar is. Ons het tans drie graad 1-klasse en vanaf graad 2 het ons twee klasse in elke graadgroep.  In graad 7 wissel ons al om die nuwe jaar tussen gemengde klasse en aparte seuns- en dogtersklasse, na gelang van die getalle en veral die dinamiek in daardie jaargroep.

Rekenaarklasse word aangebied vanaf graad 1 tot 7. Die rekenaarsentrum beskik oor 26 moderne rekenaars waarop verskeie opvoedkundige programme gelaai is. Alle rekenaars is aan die internet gekoppel.

Bedieningsarea

Bellair, Bloemhof, Blommendal, Blomtuin, Bo-Oakdale, Chrismar , De la Haye, Groenvallei, La Rochelle, Oakdale, Oakglen, Vredenberg. Ons het egter ook leerders uit die groter Brackenfell/Durbanville-area. 

Kampe & Uitstappies

Ons beperk uitstappies heeltemal en probeer eerder persone en/of groepe na die skool bring vir demonstrasies of aanbiedings vir die hele skool, fase of graadgroep.  Storieskip is een van dié groepe wat jaarliks ‘n draai by die skool maak tot vermaak en opvoeding van die hele skool.  Ons het ook al slangvertonings en interessante wetenskaplike eksperimente meegemaak

Die graad 7-leerlinge gaan jaarliks op ‘n kort oorslaapkamp. Kampterreine waar hul al gekampeer het, sluit in Waterval (Tulbagh), Kopbeenskloof Plaas (Touwsrivier) en High Africa (Worcester).

Ons leerlingraadslede gaan ook elke jaar (voor die skooljaar begin) op ‘n kort opleidingskamp, onder leiding van hul mentor-onderwysers, mnr. Jacques Viviers en me. Michelle McCarthy.

Mnr. Corné Lötter is klubleier by die Groentjiesklub. Dis ‘n buitelugklub vir graad 3 tot 7’s. Ons is aktief besig met klubkampe (hoofsaaklik kwartaal 1 en 4) en naweekuitstappies (heeljaar). Ons skakel ook gereeld in by uitstappies en/of kampe wat deur die Angra Avontuurklub gereël word. Ander volwassenes betrokke, is me. Erika Rowbotham (oud-ouer/onder-klubleier), me. Cheron Aspeling en me. Annelene Sleigh wat mekaar aflos as toesighouers tydens uitstappies en/of kampe.

Snoepie

Ons snoepie was die afgelope paar jaar deur die skool self beheer. Weens pesoneelskuiwe word dit sedert April 2019 weer op kontrakbasis uitverhuur.

Marinda Traut is die suksesvolle aansoeker wat deur die snoepiekomitee gekeur was. Mev. Traut is al lank in die spysenierings- en voedselvoorsieningsbedryf en het ook haar eie tuisnywerheidswinkel vir etlike jare bedryf. Kontak haar by 083 461 0384.

 

Fotobeeld wat wys skool gaan oor meer as net ‘n klaskamer

SKOOLLIED

Bellville-Noord wanneer ons saam is
wil ons altyd sing van jou
en met trots dra ons jou kleure
aan jou naam is ons getrou.
In ons werk is ons gelukkig,
dis ‘n lus om hier te leer.
‘n Genot om tot jou glorie
op die sportveld te presteer,
en hier bind ons vriendskapsbande
wat ons deur die jare hou.
Bellville-Noord, trou aan ons leuse,
Ja, met vreugde wil ons bou.

Website
Visitors:

8535

Kontak Ons

Tel. 021 948 3654
Faks. 021 949 2087
E-pos: lbnoord@bnprim.co.za

Adres

Van der Stelstraat
Bellville
7539

Web Design by iPlay-Media